Çerkes Derneği I Anasayfa

Адыгэ Республикэм и Адыгэ Хасэ изэфэс зэрэхигъэунэфыкIырэмкIэ, Сирийскэ Арабскэ Республикэу адыгабэ  зыщыпсэурэм хэгъэгу кIоцI политикэ гумэкIыгъошхоу илъ хъугъэм IэкIыб къэралхэм яIоф къызэрэхалъхьэрэм къыхэкIэу непэ Iэшэ зэпэуцужьыныгъэм нэсыгъ. Лажьи-хьакъи зимыIэ мамыр цIыфхэр хэкIуадэх, граждан заомрэ терроризмэмрэ ящынагъо хэгъэгум къышъхьащыхьагъ. Мыщ фэдэ лъэхъэнэ гумэкIыгъом Урысые Федерацием ипащэхэм зэпэуцужьырэ лъэныкъохэм зафагъазэ кIуачIэр амыгъэфедэнэу, шIуагъэ къэзытын зылъэкIыщт зэдэгущыIэгъухэр ашIынхэшъ, бгъуитIуми къякIущт унашъохэм яштэн псынкIэу фежьэнхэу.

Урысые Федерацием ипащэхэм зэпэуцужьыныгъэр мамырэу зэшIохыгъэным епэсыгъэу рахъухьэхэрэм Адыгэ Республикэм и Адыгэ Хасэ изэфэс адырегъаштэ ыкIи Сирием ис адыгэхэм яджэ зэпэуцужьыныгъэм адыгэхэр хащэнхэу зэрэпылъхэм пэшIуекIонхэу, ащ зыдырамыгъэхьыхынэу.

Мыщ фэдэ зэпэуцужьыныгъэм хэлэжьэрэ купхэм ащыщхэм адыгэхэм гухьэгужъныгъэу къафыряIэр, аукIынхэу зэраIорэр къыдилъытэзэ, Адыгэ Хасэм тилъэпкъэгъухэм я Хэкужъ къагъэзэжьыным нахь чанэу ыуж зэрихьагъэхэм дырегъаштэ.

1.    Адыгэ Республикэм и Адыгэ Хасэ изэфэс зафегъазэ Урысые Федерацием и Президент, Урысые Федерацием и Правительствэ тихэгъэгогъу адыгэхэу Сирием исхэу ежьхэм яшIоигъоныгъэкIэ Урысые Федерацием къэзгъэзэжьы зышIоигъоу къыкIэлъэIугъэхэм яфитыныгъэ афагъэцэкIэнэу.

Адыгэ Республикэм и Адыгэ Хасэ изэфэс зэрэхигъэунэфыкIырэмкIэ, тилъэпкъэгъухэу Урысые Федерацием къэзгъэзэжьы зышIоигъохэм апае Урысые Федерацием правовой амалхэр зэкIэ иIэх ыкIи агъэфедэх.

2. Тилъэпкъэгъэу адыгэхэр Сирием къикIыжьынхэшъ Урысые Федерацием къагъэзэжьыным пае Адыгеим, Къэбэртэе – Бэлъкъарым, Къэрэщэе – Щэрджэсым япащэхэм Iофтхьабзэу зэрахьэхэрэм Адыгэ Хасэм изэфэс адырегъаштэ.

3. Адыгэ Республикэм и Адыгэ Хасэ изэфэс хегъэунэфыкIы Урысые Федерацием къэзгъэзэжьырэ тилъэпкъэгъухэм щыIэкIэ – псэукIэу яIэщтымкIэ къэралыгъо хабзэм иорганхэм ягъусэу ишIуагъэ къыгъэкIоным зэрэфэхьазырыр.

4.  Адыгеим щыпсэурэ нэбгырэ пэпчъ, лъэпкъэу къызхэкIыгъэм емылъытыгъэу, чIыпIэ зэжъу ифэгъэ адыгэхэм я Хэкужъ къагъэзэжьынымкIэ ишIуагъэ къыгъэкIон зэрилъэкIыщтым ыкIи ащ тетэу Адыгэ Республикэу цIыф лъэпкъ зэфэшъхьафыбэ зыщыпсэурэмрэ Урысые Федерациемрэ языкIыныгъэ къызэригъэшъыпкъэжьыщтым Адыгэ Хасэм изэфэс ицыхьэ зэрэтелъыр хегъэунэфыкIы.

5.  Адыгэ Республикэм и Адыгэ Хасэ изэфэс зэрилъытэрэмкIэ, лъэпкъым зэрэпсаоу ыкIи хэтырэ адыги, чIыпIэу зыщыпсэурэм емылъытыгъэу, ипшъэрылъ лъапIэу щыт, ятэжъхэм я Хэкужъ къыгъэзэжьыныр ыкIи Урысые Федерацием, IэкIыб къэралхэм яадыгэ организацие пстэуми къяджэ Адыгэ Хэгъэгур ахэм псэупIэ гупсэф афэхъуным яIахь хашIыхьанэу.

Адыгэ Хэгъэгум и Адыгэ Хасэ и Тхьэматэу - Хьэпэе Арамбый